lyavi_tachana (lyavi_tachana) wrote,
lyavi_tachana
lyavi_tachana

"Диалог культур" Калужский областьыште!


Тачысе кечын Марий Эл делегаций самырык-влак коклаште эртарыме «Диалог культур»  лагерьыште шке вийжым терга. Тудо 23 ноябрь гыч 2 декабрь марте Калужский областьыште Боровский районын Петрово ялыште эрта. Россий Федерацийын 60 утла регионжо гыч проект дене кылым кучышо да этно шÿлышан самырык ÿдыр-рвезе-влак «Этномир» центрыште верланеныт.


Марий Эл гыч визытын улыт: Япаева Татьяна, Республикысе марий тÿвыра рÿдерын пашаенже, Куприянова Елена, Калык-влак кокласе кылым вияндыме шотышто самырык министрже, Сафина Алина, Самырык министерствын консультантше, Петрова Валентина, Марий Кугыжаныш Университетын студенткыже, Эштуков Игорь, Самырык инициативный группын представительже.

Икымше кечым погынымаш кечылан шотлаш лиеш. Кече мучко автобус Моско гыч самырык ÿдыр-рвезе-влакым «Этномирыш» кондеден. Тыгак кас кочкыш деч вара толшо-влаклан Тыныслык урем дене экскурсийым эртареныт.

Кокымшо кечын «Диалог культур» лагерьым почмо мероприятийже лийын. Тудо саламлымаш мут дене тÿналын. Тыге, Андрей Владимирович Меженько,  Калык-влак паша шотышто федеральный агенстве вуйлатышын алмаштышыже, самырык ÿдыр-рвезе-влаклан форумышто тÿвыргö пашам, у вашлиймашым да шижмашым, тыгак проект-влакын илышыш шындарымым тыланыш.

Тудын деч вара мутым «Этномир» центрын представительже Т.В. Григорьева нале. Икымше лекцийым Владимир Юрьевич Зорин,  Россий Федераций Президент пелен калык-влак паша шотышто Советын членже, онай йодыш-влак дене эртарыш. Тыгак ты кече шоу-тренинг дене ойыртемалтын. Тудым  С.В. Тетерский, «Мотиватор24» Международный форсайт клубын президентше, интерактивный подходым кучылтын, эртарыш. Кечым иктешлыме пленумышто «Диалог культур» лагерьын участникше-влакым ныл тÿшкалан пайленыт: «Этнообразований», «Этнособытий», «Этнотуризм» да «Этнопродукт». Кажне тÿшкам куратор вуйлата.


Кумшо кечын проектым лончылымо паша корныш лекме. Лекций да тÿшка кöргыштö эртыше семинар-влак илышыште улшо проблеме-влак дене кылдалтыныт. Ты кечын «Диалог культур» лагерьын участникше-влак деке Жугдэрдэмидийн Гуррагча, монгол калыкын икымше космонавтше, саламлымаш мут дене толын. Йырваш самырык тукымын нимучашдыме куан шижылтын.


Паша кече иктешлыме пленум дене мучашлылтын. Тыште кажне тÿшка гыч сайлен налме докладчик презентаций семын проблеме-влакым калык ончыко луктын ойлен. Кас кочкыш деч вара «Этномирын» командыже онай квестым эртарен. «Диалог культур» лагерьын участникше-влак тÿрлö заданий-влакым эртен, калыкын тÿвыраже дене палыме лийыныт.


Фото авторын да тыгак https://vk.com/ethnomirru сайт гыч налме.
Subscribe
  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments