lyavi_tachana (lyavi_tachana) wrote,
lyavi_tachana
lyavi_tachana

Колымшо Йылме Фестиваль Чебоксарыште!

Йылме Фестиваль – тӱвыра да шинчымаш дене кылдалтше проект. Тиде мероприятийыште тӱрлӧ йылме, историйже да тудын дене кылдалтше тӱвыра нерген палдарат. Тыгай форматан мероприятий шукерте огыл Чебоксарыште эртен. Тушко мыламат мияш пиал шыргыжалын.


24-ше октябрьыште Чуваш Кугыжаныш Педагогике Университетыште Йылме Фестиваль шке омсажым почын.

Тудо концерт дене тӱҥалын. Юбилейже лийын гынат, ала-могай эффектше ситен огыл, шонем. Тушто куштышо йоча коллектив-влак выступатьленыт, тыгак университетын представительже-влак (кӧ именно лийын, шарнен шым код) да видео гоч мутланыше йот кундем гыч толын кертдыме ончычсо презентатор-влак фестивальын участникше-влакым саламленыт. Вара кажне презентатор сценышке лектын да шке семынже занятийышкыже ӱжын.

Программым кидышке кучымеке, мый изишак ӧрынам. А могай йылме урокыш каяш? Кузе 40 гыч иктыжым ойырен налаш? Но сценыште презентатор-влакым ужмеке, ойыраш куштылгырак лие. Кӧ оҥайын шкеж деке ӱжын, тудын деке каяш шонен пыштенам. Но... японка деке садак шым логал, потомушто тудын аудиторийыштыже еҥ мый дечем поснат шуко лийын. Вашке гына йолташ ӱдыр дене ала-могай омсашке пурышна. Ончална, а тушто таджик тӱвыра нерген кутырат улмаш. Тыге мый икымше занятием таджик йылме презентацийыште шинчын лектынам. Тудым Амира Кадырова эртарен. Моткоч оҥай ыле таджик калыкын сӱанже нерген пален налаш. Мутлан, тушто сӱаным 7 кече деч утларак эртарышаш огытыл, оксам лу тӱжем доллар деч шагалрак пытарышаш улыт да 500 утла еҥ унаште лийшаш огыл. Тиде у закон почеш. А эше туштооо... Лучо шке марий рвезылан марлан каяш, чем тиде калыкын представительжылан . Йылме шотышто нимат шырнен шым код, тунар чот тӱвыраже ӧрыктарыш... Тыгак, ӱдырамаш-влакын тушто статусышт уло. Кӧн шукырак шӧртньӧ, тудым чотрак пагалат. Теве тыге!

Вес кок урокшым марий йылмыште шинченам. Иктыже - олык марий, а весыже - курык марий. Олык марий йылмым тунемаш мый денем пырля ныл еҥ толын ыле, но тидат, мыйын шонымаште, сай лектыш. Икымше ошкыл садиктак лийын да толшо-влаклан шукырак жапым ойырымо. Олык марий йылмым Марий Кугыжаныш Университетын студенткыже-влак эртареныт. Вероника Мустаева тӱвыра да Марий Эл нерген ойлен гын, Аня Васильева алфавит дене палдарен, икмыняр шомак-влаклан туныктен, падеж мутмучаш-влакым рашемден да предложенийым чоҥаш таратен. Тыгай чапле презентацийым ямдылыман ӱдыр-влаклан кугу таум каласем. Курык марий йылме урокым Борис Апасейкин (Курыкмарий районышто илыше экономистлан тыршыше марий рвезе) да Максим Рябчиков (Моско олаште ила) намиеныт. Максим историй дене кугу кылым куча, тиде кутырымыж гыч коеш, а Борис йылме деке шӱманрак. Фотошто мый гына ом сите, эрвел марийын представительже, вет тыште олык марий ӱдыр-влак курык марий рвезе-влак коклаште шогат.

Вес кечын, а тиде 25 октябрьыште, ныл урокыш, ӧрканыде, миенам. Содыки японке дек логалаш тыршышым. Адак тич калык, шеҥгелне коло еҥ наре занятий мучко шогеныт даже. Мый умылышым: тиде йылмым тунемнет гын, пӱ пурын тунемман, а тыглай веле огыл. Япон йылме - мыйын ушлан огыл. Урокым Чисато Фуджимото лӱман ӱдыр намиен. Тудо Хиросима ола гыч улеш. Мыланем "Катакама" возымо версий дене лӱмемым японла кагаз ластыкыш возен кодыш. Тидлан тау!



Эсперанто, эсперанто... Шерым темышт тиде мут дене. Мо тиде тыгай? Эсперанто йылме презентацийыш каяш шонымаш лекте. Содыки Моско гыч толшо кугу айдеме эртара. Кӧ? Да ала-могай Ирина Гончарова. Тудо - Международный АН Сан-Марино педагогике магистр, 40 ияш стажан эсперанто йылмым туныктышо, книга-влакын авторжо, Моско MASI эсперанто-ассоциацийын координаторжо да Моско Йылме Фестивальын директоржо.
Чылажат доступно умылтарыш. Но мый, англичан йылмым палыше, эсперанто йылмым тунемза манын ом кычкыре. Паледа молан? Эсперанто - проста калыклан, шке коклаште веле мутланаш, а англичан йылме - тиде - паша йылме, тудо кажне ошкылышто кӱлешан улеш.


Умбакыже итальян йылмыш пурынем ыле, но ала-молан "Содружество" Международный волонтерский центрыш кайшым. Самырык-влак дене пашам ыштем гын, нуныланат ала-мом уым пален налаш шонен пыштенам улмаш. Тиде шотышто шуко кутыраш лиеш, но мый вес ганалан кодем. Вашке гыч самырык-влак дене погынымашыште чылажат ойлем. Тиде 45 минутан занятий пеш кӱлешан лие.

Пытартыш - финн йылме презентаций. Молан финн йылмыште ик мутыш ала-мом пеш шуко ушат? Молан кужу мут ик предложенийым вашталтен кертеш? Мыланем тидым йӧсӧ умылаш. Оҥай ыле англичан йылме дене кутырышо финн презентаторым колышташ да тыгодым кусарыше еҥжым эскераш. А вет кусарышыже чыла шот дене ыш кусаре! Но тиде тӱҥжӧ огыл. Йылме презентацийышт сайынак эртен. Мучашлан изирак пӧлекым кучыктеныт. Тау, Саара Ханнула!

Тыге мыйын каныш кече-влак эртышт. Моткоч пайдалын да ончыкылыклан изи лектышым пуа манын, ӱшанен кодам. Йылме Фестивальыш логалаш тыршыза!


Tags: эртыме корно
Subscribe
  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments