lyavi_tachana (lyavi_tachana) wrote,
lyavi_tachana
lyavi_tachana

Калтак ялыште Семык пайрем эртен! "Олык марий" ансамбль дене пырля.


13 июньшыто Кна вел Мензелинск район Калтак ялыште республик кӱкшытан Семык пайрем эртыш. Тушто Шернур районын Чылдемыр тӱвыра пӧрт пеленсе мурышо да куштышо «Олык марий» ансамбльже ик эн кугу да вучымо уна лийын.

Тиде мероприятийын программыже почеш эрдене кандаш шагат гыч индешат пеле марте Калтак ялысе «Мари кас» ансамбль кинде-шинчал дене толын шогышо уна-влакым вашлийын.

Варажым Семык пайремыште шке мастарлыкшым ончыкташ шонышо ансамбль регистрацийым эртен. Тушто кажнылан пӧлек вашеш марий куштымашлан туныктышо этнический сынан дискым кучыктеныт. Пайрем шествий ял урем мучко шарлен. Икмыняр пӧрт ончылно оза-влак ӱстембал тич сийым ямдылен, уна-влакым вученыт.

Пайрем концертын тӱҥалмыж деч ончыч мемнан «Олык марий» ансамбльым телевиденийыш возаш наҥгайышт. Мардеж озалана ыле гынат, икмыняр номерым ял уремын ик лукыштыжо ансамбльын участникше-влак мурен ончыктеныт.

Семык пайремым марий карт-влак почыныт. Варажым мутым Мензелинск район вуйлатыше Салахов Айдар Фаслахович налын. Тыгак  «Единая Россия» партийын вуйлатышым алмаштышыже, «Милосердие» ӱдырамаш депутат ушемын вуйлатыше Исаева Анастасия Георгиевна марий калыкым пайрем дене саламлен. Марий Эл делегацийым кондышо Шернур тӱвыра пӧртым вуйлатыше Швецова Августа Алексеевна, Марий Эл Республикын тӱвыра, печать да калык-влакын пашашт шотышто министр Васютин Михаил Зиновьевичын колтымо саламлымаш серышыжым лудын, пайрем озажлан кучыктен. Умбакыже Семык пайремын флагшым гимн мурымо почеш нӧлтальыч. Тыге кугу концерт тӱнале.

Концерт номерла коклаште «Чевер марий ӱдыр – 2015» конкурсым почыч. Тиде мероприятийын цельже теве могай:

- ончыкылык тукымлан калык йӱлам пуэн кодымым аралымаш да шуарымаш,

- калыкым марий тӱвыра деке шӱмаҥдымаш да тудын нимучашдыме акшым пагалаш туныктымаш,

- ӱдырамашын калык коклаште тале улмыжым ончыктымаш, тудын моторлыкшым да порылыкшым шуарымаш,

- усталык шӱлышым тӱрыс почын пуымаш,

- марий калыкын духовно-нравственный культурный ценностьлан эҥертен, самырык тукымым эстетический да нравственный шӱлышлан туныктымаш.

«Чевер марий ӱдыр» конкурс нерген пален омыл гынат, писын гына положенийжым ончал лектын, мыят шке вием тергаш куржым. Шуко конкурсшо марий подворьеште эртен. Мутлан, этнографический шӱлышан, пеледыш дене кылдалтше да «Тывырдык» попурри почеш куштымо конкурс-влак. Тыште кандаш ӱдыр шке мастарлыкшым ончыктен. Мутат уке, шукышт ямдылалт толыныт. Чаманен каласаш логалеш, ожнысо ӱзгар-влакым ме, кушкын шогышо тукым, огына пале. Тиде конкурсым эртарыше ӱдырамашым чаманен колтышым. Тудо, очыни,  шонен мемнан деч шуко информацийым колаш. Тунам тыгай шонымаш вуйыш толын пурыш: чӱчкыдын тоштерыш кошташ да кумданрак ожнысо илыш дене палыме лияш.

Тыгак пеледыш гыч венокым пунаш тунемман. Кӧ изинек тидлан шӱмаҥын огыл, тудын кид вийже начар. Тиде мый шке нергенем кызытеш каласышым. Ойырен пуымо жапыште пеледышан венокым пунаш куштылгак огыл. Каласен кодаш кӱлеш, пеледыш дене шогылтмо годым участнице-влакын татарла мутланымыштымат кольым. Тиде моткоч сай шочмо йылмым веле огыл, пошкудо калыкын йылмыжымат палаш!

«Тывырдык» конкурсым тичмаш умылен шым шу. Тушто ала сольный номержат лийшаш ыле гын, ала тӱрлӧ сем почеш куштыманже тӱҥ ыле, палыде кодым. Туге гынат, такмак-влакым мурен-куштен ончыктымо да кандырам ӱдыр-шамыч дене пунымо. Кысык да мунчалтыше верыште шке вийнам тергенна.

Теве тыге сходу (рушла каласаш гын) чапле да оҥай конкурсышто участвоватьлыме.

«Чевер марий ӱдыр – 2015» лӱмым Мальвина Иванова Мамадыш гыч толшо чолга ӱдыр сеҥен нале. Тудын дене ме икымше конкурсыштак палыме лийна. Каласен кертам, Мальвина шочмо йылмыжым да марий тӱвырам йӧрата да самырык коклаште шуарен шога.

Семык пайремыште пеш шуко ансамбль концерт номер-влак дене выступатьлен. Мемнан Чылдемыр тӱвыра пӧртат ӧрдыжеш кодын огыл. Тыгак тӱрлӧ спортивный мероприятий эртен. Чылажат тӱҥ сценыште мучашленыт. Семык флагым волтымо деч вара пайрем программе мучашышке лишемын. Тора гыч толшо «Олык марий» ансабль шуко концерт номержым тӱҥ сценыште пытартышлан веле ончыктен. Мемнам пагалыше калыкше каен огыл, шагалын гынат, но мучаш марте пырля лийын. Нунылан моткоч кугу таум каласыме шуэш.

Мӧнгӧ велыш кайыме деч ончыч мемнам Абдулгараев Владимир унаш пуртыш. Тыгай поро айдемылан да тудын ешыжлан лоҥ куго рахматым (эрвел марий диалект) ойлена да пеҥгыде тазалыкым тыланена. Чыла вере тыгайым от вашлий. Пагален ӱжмашым шӱкал кодаш да ямдылыме шокшо кочышым коден каяш ойӧрӧ маныт эрвел марий-влак.



Tags: эртыме корно
Subscribe
  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments