lyavi_tachana (lyavi_tachana) wrote,
lyavi_tachana
lyavi_tachana

Йоча-влак дене веле паша вораҥеш.


"Тендан урем кужу, кумда,
Толыдалмашем уке ыле шол,
Толыдалмашем уке ыле.
Седыге пырля лийына манын
Шоналмашем уке ыле.
Теле каникул деч вара школ мучко адак йоча йӱк шергылте. Мыланна, ялысе туныктышо-влаклан, умбакыже тунемше-влакым кумда да келге илыш-корныш лукташ ямдылен шогыман. Теле каникул гына мо, шошат эртыш ынде, шоналтеда те, лудшо-влак. Чынак, уремыште апрель, а мый кызыт веле блог пашамым шарналтенам. Амалже уло. Пытартыш жап эре корныш лектын коштам, компьютер воктене шинчымаш уке. Туге гынат, эртыше жапым иктешлен кодыман, вес гана шарналташлан тек тиде лаштык полша.
Самырык ялысе туныктышын илышыже эре еҥ шинча ончылно. Кушко гына от мий, кузе гына от вашталт, мом гына от каласе - чылажат иктаж-кӧн йылме мучашыште пӧрдеш. Шып илен шкежат ом мошто. Пашадар начаррак гынат, але иктаж-вере йӧршын шке кумыл дене гына ыштем гынат, йочан поро да весела шинчаончалтышыже лийже манын гына.

Купран школысо илыш ик верыште ок шого. Февраль тылзе ик оҥай вашлиймаш дене тӱҥалын. 7 числаште 5-9 класс тунемше-влак ончылно Россий кӱкшытан марий самырыктукым слётын участникше-влак выступатьлышт. Тиде мероприятийым мый "Тӱня мучко шаланен марий калык ила" лӱман презентаций дене почым. Мутат уке, мемнан тунемше-влак марий калыкын Россий мучко илмыже нерген пеш пален огытыл. Умбакыже Рома Шабдаров мутым нале. Тудо слёт нерген оҥай презентаций да видеом ямдылен ыле. Тыгак марий калыкын историйжым ушештарыш да марий йылме дене кутырымо улшо проблемым нӧлтале. Тысе вер-шӧрлан тиде моткоч йӧнан. Кызытеш ача-ава йоча дене шиждегеч рушла веле кутыра. Мероприятийыште эше Сергей Иванов да Буркова Мария лийыныт.
Тыгак районышкат эре лектын коштедаш перна. Мутлан, "Конкурс чтецов" да "Фестиваль иностранных песен" февральыштак эртеныт.


Лач ик эн тӱвыргӧ пашалан мый республик кӱкшытан "Ӱарня" йоча пайремым шотлем. Тыгай пайремыште нигунам лийдыме айдеме ямдылалтме пашан уло тамжым шижын. Тиде мероприятий 22 февральыште Верх-Ушнур селаште эртен. Мый йоча-влакым эрвел марий программе дене намиенам. Эрден эрок кыстывийым (татар да пошкырт калыкын мелнаже) кӱэштме, йӱд мартыже Ӱарня чучелым ыштыме. Тыгак йоча-влаклан почеламутым шкеак возен пуэнам:
Вашкенна ме Верх-Ушнурыш,
Ший саламым погалтен!
Сылне Ӱарня пайремыш
Йолташем чолган ушнен.

Ӱарня пайремлан толын
Пошкырт Эл гычын ковам.
Онченам ӱстелыш ӧрын:
"Мо тугай? Могай мелна?"

Ӧрын ончымемым ужын,
Воштылалын каласен:
"Тамлен ончо кыстывийым,
Ит кошт тудым вискален".

Ах, кузе шула умшаште!
Иктым вел кочкат - темат.
Пошкырт велне пайремлаште
Кыстывийым пеш ыштат.
Тыгак Ӱарня куван презентацийжылан икмыняр марий такмакым шке семын вашталтен возымо:
1)   
Айста ӱдыр-эрге-влак
Ӱарням пайремлена.
Ӱарнялан тамле мелнам
Кӱэштын ямдылена.

2)    Ик сер гычын вес серышке
Кидетым пу йолташем.
Ӱарня ковайнам чикташ
Тувырет пу, йолташем.

3)    Ошо ошым йӧрата,
Шеме шемым йӧрата.
Пеледышан ал ялукым
Ковай пидаш йӧрата.

4)    Лӱмжӧ лийже Янсипа,
Койышыжо – чатката.
Тек пайремлан веле огыл
Чыланнам куандара.

5)    Ой мелнаже, мелнаже,
Ӱстел тичак мелнаже.
Мемнан Ӱарня кованан
Пӱртӱс деч уста кидше.

6)    Алием-влак дене,
Гӱлием-влак дене.
Муралтена-кушталтена
Янсипа бовай дене.

Изирак пашана кугу мероприятийыште садак йомын огыл. Туге гынат, йоча-влакын ушышто кугу шарнымаш кодын. Мӧҥгӧ кайме корнышто шуко сай мутым нунын дечын колынам.
Шке жапыштыже ыштыдыме паша пеш кӱчӱк лиеш, сандене вуеш ида нал, тидын дене мучашлем.




Tags: эртыме корно
Subscribe
  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 1 comment